ເນື່ອງໃນໂອກາດທີ່ ພັກກອມມູນິດຫວຽດນາມ ເປີດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII, ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ສົ່ງໂທລະເລກອວຍ ພອນເຖິງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດຫວຽດນາມ ຊຶ່ງມີບາງເນື້ອໃນສໍາຄັນ ດັ່ງນີ້:
ຕາງໜ້າໃຫ້ ພັກປະຊາຊົນ ປະຕິວັດລາວ, ພວກຂ້າພະເຈົ້າ ມີຄວາມປິຕິຊົມຊື່ນເປັນຢ່າງຍິ່ງ ຂໍສົ່ງຄວາມຊົມເຊີຍ ແລະ ຄໍາອວຍພອນໄຊອັນປະເສີດມາຍັງ ກອງປະຊຸມໃຫຍ່ ແລະ ໂດຍຜ່ານກອງປະຊຸມໃຫຍ່ໄປຍັງສະມາຊິກພັກ ແລະ ປະຊາຊົນຫວຽດນາມອ້າຍນ້ອງທຸກຖ້ວນໜ້າ.
ພວກຂ້າພະເຈົ້າ ຕີລາຄາສູງຕໍ່ບັນດາໄຊຊະນະອັນສະຫງ່າງາມ, ຜົນສໍາເລັດທີ່ໃຫຍ່ຫຼວງສໍາຄັນ, ຮອບດ້ານ, ມີຄວາມໝາຍປະຫວັດສາດຂອງປະຊາຊົນຫວຽດນາມອ້າຍນ້ອງ ທີ່ຍາດມາໄດ້ທັງໃນໄລຍະຕໍ່ສູ້ກູ້ຊາດເພື່ອປົດປ່ອຍປະເທດຊາດໃນເມື່ອກ່ອນ ກໍຄືພາລະກິດສ້າງສາ ແລະ ປົກປັກຮັກສາປະເທດຊາດໃນປັດຈຸບັນ ໂດຍພາຍໃຕ້ການນໍາພາອັນສະຫຼາດສ່ອງໃສ, ຖືກຕ້ອງ ແລະ ປະດິດສ້າງຂອງ ພັກກອມມູນິດຫວຽດນາມ, ພິເສດແມ່ນພາຍຫຼັງທີ່ພັກກອມມູນິດຫວຽດນາມ ໄດ້ລິເລີ່ມ ແລະ ນໍາພາພາລະກິດປ່ຽນແປງໃໝ່ເປັນເວລາ 35 ປີກວ່າຜ່ານມາ ແລະ ການປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກກອມມູນິດຫວຽດນາມ ເຮັດໃຫ້ຫວຽດນາມມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ, ເສດຖະກິດມີການພັດ ທະນາດ້ວຍຈັງຫວະສູງຢ່າງຕໍ່ເນື່ອງ; ບົດບາດ, ອິດທິພົນຂອງ ສສ ຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ. ພິເສດໃນໄລຍະມໍ່ໆມານີ້, ພັກ, ລັດຖະບານຫວຽດນາມ ໄດ້ມີຜົນສໍາເລັດທີ່ໂດດເດັ່ນໃນການພັດທະນາເສດຖະກິດ-ສັງຄົມ ໃນໄລຍະສະກັດກັ້ນ, ຄວບຄຸມ, ຮັບມືກັບການແຜ່ລະບາດຂອງພະຍາດ ໂຄວິດ-19, ໄພທໍາມະຊາດທີ່ຮ້າຍແຮງ ຊຶ່ງໄດ້ຮັບການຕີລາຄາສູງຈາກວົງຄະນາຍາດສາກົນ.
ບັນດາຜົນສໍາເລັດດັ່ງກ່າວ ເປັນການຢືນຢັນອີກເທື່ອໜຶ່ງເຖິງການນໍາພາອັນສະຫຼາດສ່ອງໃສ, ຖືກຕ້ອງ ແລະ ປະດິດສ້າງຂອງພັກກອມມູນິດຫວຽດນາມ ທັງເປັນການສະແດງເຖິງຄວາມເດັດດ່ຽວໜຽວແໜ້ນຂອງ ພັກ, ລັດ, ຄວາມບາກບັ່ນພະຍາຍາມກ້າວຂຶ້ນດ້ວຍເຫງົ້າພະລັງຄວາມສາມັກຄີເປັນປຶກແຜ່ນຂອງທົ່ວທັງຊາດ ເພື່ອບັນລຸເປົ້າໝາຍ ປະເທດຊາດເຂັ້ມແຂງ, ປະຊາຊົນມີຄວາມຜາສຸກ, ປະຊາທິປະໄຕ, ຍຸຕິທໍາ ແລະ ສີວິໄລ. ບັນດາຜົນສໍາເລັດດັ່ງກ່າວເປັນການໃຫ້ກໍາລັງໃຈອັນແຮງກ້າແກ່ ພັກ, ລັດ ແລະ ປະຊາຊົນລາວບັນດາເຜົ່າ ໃນພາລະກິດປົກປັກຮັກສາ ແລະ ສ້າງສາປະເທດຊາດຂອງພວກຂ້າພະເຈົ້າ.
ກອງປະຊຸມໃຫຍ່ຜູ້ແທນທົ່ວປະເທດຄັ້ງນີ້ ຂອງພັກກອມມູນິດຫວຽດນາມ ເປັນເຫດການການເມືອງທີ່ສໍາຄັນຂອງທົ່ວ ພັກ, ລັດ ແລະ ປະຊາຊົນຫວຽດນາມ, ເປັນຂີດໝາຍແຫ່ງການພັດທະນາທີ່ເຂັ້ມແຂງຂອງການປະຕິວັດຫວຽດນາມໃນໄລຍະໃໝ່ຕາມທິດ ສາມັກຄີ, ປະຊາທິປະໄຕ, ເດັດດ່ຽວ, ປະດິດສ້າງ, ພັດທະນາດ້ວຍການສືບຕໍ່ເພີ່ມທະວີການກໍ່ສ້າງ, ປັບປຸງພັກ ແລະ ລະບອບການເມືອງໃຫ້ປອດໃສ, ເຂັ້ມແຂງ; ເສີມຂະຫຍາຍຄວາມມຸ້ງຫວັງໃນການພັດທະນາປະເທດຊາດ, ເສີມຂະຫຍາຍມານະຈິດປະຕິວັດ, ເຫງົ້າພະລັງແຫ່ງມະຫາສາມັກຄີທົ່ວທັງຊາດ ໄປຄຽງຄູ່ກັບການສົມທົບແໜ້ນກັບກໍາລັງແຮງຂອງຍຸກສະໄໝ; ສືບຕໍ່ຊຸກຍູ້ພາລະກິດປ່ຽນແປງໃໝ່ຢ່າງຮອບດ້ານ ເປັນລະບົບ; ສ້າງສາ ແລະ ປົກປັກຮັກສາປະເທດຊາດໃຫ້ໜັກແໜ້ນ; ຮັກສາສະພາບແວດລ້ອມສັນຕິພາບ, ສະຖຽນລະພາບ; ສູ້ຊົນເພື່ອໃຫ້ປະເທດກາຍເປັນປະເທດພັດທະນາຕາມທິດສັງຄົມນິຍົມ ໃນກາງສະຕະວັດທີ 21.
ໃນຖານະເປັນພັກທີ່ເກີດມາຈາກກົກເຄົ້າດຽວກັນ, ເປັນປະເທດຮ່ວມອຸດົມການ ພວກຂ້າພະເຈົ້າຂໍຢືນຢັນວ່າ ເຖິງວ່າສະພາບການພາກພື້ນ ແລະ ໂລກ ຈະມີການຜັນແປໄປແນວໃດກໍຕາມ, ພວກຂ້າພະເຈົ້າ ຈະສືບຕໍ່ຮ່ວມກັບ ພັກ, ລັດ ແລະ ປະຊາຊົນຫວຽດນາມ ເພື່ອພ້ອມກັນປົກປັກຮັກສາ, ຖະນຸຖະໜອມ ແລະ ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິ ເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ທີ່ປະທານ ໂຮ່ຈິມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ໄດ້ສ້າງຕັ້ງ ແລະ ຖະນຸຖະໜອມມາເປັນເວ ລາຫຼາຍສິບປີ ແລະ ໄດ້ຮັບການເສີມຂະຫຍາຍ ດ້ວຍເລືອດເນື້ອຂອງບັນດາຮຸ່ນການນຳ, ນັກຮົບປະຕິວັດຂອງປະຊາຊົນສອງຊາດຕະຫຼອດມາ ຊຶ່ງໄດ້ກາຍເປັນມໍລະດົກລວມທີ່ລ້ຳຄ່າຂອງສອງຊາດ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງຊາດ, ເປັນໜຶ່ງໃນປັດໃຈຕັດສິນໄຊຊະນະຂອງການປະຕິວັດຢູ່ແຕ່ລະປະເທດນັ້ນ ໃຫ້ນັບມື້ແຕກດອກອອກຜົນ ແລະ ມີປະສິດທິຜົນຍິ່ງໆຂຶ້ນ, ປະກອບສ່ວນຢ່າງຕັ້ງໜ້າເພື່ອ ສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
ເນື່ອງໃນໂອກາດອັນສະຫງ່າລາສີນີ້, ອີກເທື່ອໜຶ່ງ ພວກຂ້າ ພະເຈົ້າ ຂໍສະແດງຄວາມຂອບໃຈຢ່າງຈິງໃຈ ແລະ ຄວາມຮູ້ບຸນ ຄຸນຢ່າງເລິກເຊິ່ງຕໍ່ ພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການສະໜັບສະໜຸນ ແລະ ຊ່ວຍເຫຼືອຢ່າງໃຫຍ່ຫຼວງ, ລ້ຳຄ່າ, ໝົດຈິດໝົດໃຈ, ມີປະສິດທິຜົນ ແລະ ທັນການແກ່ ພັກ-ລັດ ແລະ ປະຊາຊົນລາວ ໃນພາລະກິດຕໍ່ສູ້ເພື່ອເອກະລາດແຫ່ງຊາດໃນເມື່ອກ່ອນ ກໍຄືໃນພາລະກິດປົກປັກຮັກສາ ແລະ ສ້າງສາປະເທດຊາດ ຂອງພວກຂ້າພະເຈົ້າໃນປັດຈຸບັນ.
ຂໍອວຍພອນໃຫ້ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດຫວຽດນາມ ຈົ່ງປະສົບຜົນສຳເລັດຢ່າງຈົບງາມ.
ພ້ອມນີ້ ຂໍສົ່ງຄໍາອວຍພອນໄຊອັນປະເສີດໃຫ້ແກ່ ພັກກອມມູນິດຫວຽດນາມ ເນື່ອງໃນໂອກາດວັນສ້າງຕັ້ງ ພັກກອມມູນິດຫວຽດນາມ ຄົບຮອບ 91 ປີ ໃນມໍ່ໆນີ້.
ອວຍພອນໃຫ້ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງສວຍສົດງົດງາມ, ໝັ້ນຄົງຂະໜົງແກ່ນ ຕະຫຼອດໄປ.
ໃນໂອກາດດຽວກັນນີ້, ການນໍາຂັ້ນສູງ ບັນດາຄະນະຂອງສູນກາງພັກ, ກະຊວງ, ຂະແໜງການ, ສູນກາງແນວລາວສ້າງຊາດ, ບັນດາອົງການຈັດຕັ້ງມະຫາຊົນຂັ້ນສູນກາງ ຂອງ ສປປ ລາວ ກໍໄດ້ສົ່ງໂທລະເລກອວຍພອນ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກອມມູນິດຫວຽດນາມ ເຖິງຄູ່ຮ່ວມຕໍາແໜ່ງຂອງຫວຽດນາມ ເຊັ່ນດຽວກັນ.