ຄຳເຫັນຂອງທ່ານ ຄໍາເຜີຍ ແກ້ວກິນນາລີ, ຮອງປະທານ ຜູ້ປະຈໍາການຄະນະກໍາມະການຮ່ວມມື ລາວ-ຫວຽດນາມ

ເພື່ອເສີມຂະຫຍາຍ ແລະ ຮັບປະກັນໃຫ້ແກ່ວຽກງານການປະຕິບັດພາລະບົດບາດເປັນເສນາທິການໃຫ້ແກ່ສູນກາງພັກ, ລັດຖະບານ ກໍ່ຄືກະຊວງແຜນການ ແລະ ການລົງທຶນ ໃນການເຄື່ອນໄຫວວຽກງານການພົວພັນຮ່ວມມື ລະຫວ່າງ ລາວ ແລະ ຫວຽດນາມ, ຂ້າພະເຈົ້າ ເຫັນວ່າ: ການເປີດເວັບໄຊ ຂອງຄະນະກໍາມະການຮ່ວມມື ລາວ-ຫວຽດນາມ ແມ່ນມີຄວາມໝາຍຄວາມສຳຄັນ, ຈຳເປັນຫຼາຍ ແລະ ຈະເປັນໂອກາດ ແລະ ເປັນເຄື່ອງມືທີ່ດີ ໃຫ້ແກ່ຄະນະກໍາມະການຮ່ວມມື ລາວ-ຫວຽດນາມ ເຊິ່ງນອກຈາກຈະເປັນການໂຄສະນາ, ເຜີຍແຜ່ຂໍ້ມູນຂ່າວສານ ແລະ ການເຄື່ອນໄຫວວຽກງານການຮ່ວມມື ລາວ-ຫວຽດນາມ ແລ້ວຍັງຈະໄດ້ໂຄສະນາ​ເຜີຍ​ແຜ່​ແນວທາງ​ນະ​ໂຍບາຍ​ຂອງ​ພັກ-​ລັດ​ເຮົາ, ການ​ເຕີບ​ໃຫຍ່​ຂະຫຍາຍຕົວ​ດ້ານ​ການ​ພັດທະນາ​ເສດຖະກິດ-​ສັງຄົມ, ດຶງ​ດູດ​ການ​ລົງທຶນ, ການທ່ອງທ່ຽວ, ການ​ແລກປ່ຽນ​ຂໍ້​ມູນ​ຂ່າວສານ ​ແລະ ອື່ນໆ ທີ່​ມີ​ປະ​ໂຫຍ​ດຕໍ່​ປະ​ເທດ​ເຮົາ.
ນອກຈາກ​ນັ້ນ, ​ໃນ​ຖານ​ະທີ່ລາວ ແລະ ຫວຽດນາມ ເປັນປະເທດເພື່ອນມິດຍຸດທະສາດ, ມີມູນເຊື້ອມາແຕ່ດົນນານ. ສະ​ນັ້ນ, ການ​ສ້າງ​ເວັບ​ໄຊ​ຂອງຄະນະກໍາມະການຮ່ວມມື ລາວ-ຫວຽດນາມ ກໍ່​ຍິ່ງ​ມີ​ຄວາມ​ຈຳ​ເປັນ​ຫຼາຍ ​ເພາະ​ພວກ​ເຮົາ​ຈະ​ໄດ້​ມີ​ການ​ສື່ສານ, ​ໂຄສະນາ, ປະຊາສຳພັນ ​ເພື່ອ​ແລກປ່ຽນ​ຂໍ້​ມູນ​ຂ່າ​ວສານ​ ກັບ ສສ ຫວຽດນາມ.

ສະນັ້ນ, ຂ້າພະ​ເຈົ້າ ຈຶ່ງ​ຂໍ​ຖື​ໂອກາດ​ນີ້ ຂໍ​ສະ​ແດງ​ຄວາມ​ຊົມ​ເຊີຍ ຫ້ອງການ​ຄະນະກໍາມະການຮ່ວມມື ລາວ-ຫວຽດນາມ ທີ່​ໄດ້​ມີ​ຄວາມ​ພະຍາຍາມ​ໃນ​ການ​ປະຕິບັດ​ພາລະ​ບົດບາດ​ຂອງ​ຕົນ ດ້ວຍ​ຄວາມ​ຮັບຜິດຊອບ​ຢ່າງ​ສູງ ດ້ວຍການລິເລີ່ມ ແລະ ​ປັບປຸງ​ລະບົບ​ຂໍ້​ມູນ​ຂ່າວສານ​ຂອງ​ຕົນ​ໃຫ້​ຫັນ​ເປັນ​ທັນ​ສະ​ໄໝ​ເທື່ອ​ລະ​ກ້າວ. ຂ້າພະ​ເຈົ້າ ​ຫວັງ​ຢ່າງ​ຍິ່ງ​ວ່າ ເວັບໄຊ​ນີ້ ຈະ​ກາຍ​ເປັນ​ພາຫາ​ນະ​ໜຶ່ງ​ທີ່​ສຳຄັນ​ ​ເຮັດໃຫ້​ການເຄື່ອນໄຫວວຽກງານການໂຄສະນາ ປະຊາສໍາພັນການພົວພັນຮ່ວມມື ລະຫວ່າງ ລາວ ແລະ ຫວຽດນາມ ມີຄວາມວ່ອງໄວ, ສະດວກຍິ່ງຂຶ້ນ,  ​ປະກອບສ່ວນ​ຊ່ວຍ​ຂັບ​ເຄື່ອນການ​ພັດທະນາ​ເສດຖະກິດ-​ສັງຄົມ ຂອງ​ປະ​ເທດ​ຊາດ​ຂອງ​ພວກ​ເຮົາ​.

ອວຍພອນ​ໃຫ້​ ເວັບ​ໄຊ​​ຂອງ ຄະນະກໍາມະການຮ່ວມມື ລາວ-ຫວຽດນາມ​ ຈົ່ງ​ເປັນສື່​ມວນ​ຊົນ​ປະ​ເພດ​ໜຶ່ງທີ່​ເປັນ​ກະບອກ​ສຽງ​​ໃນ​ການ​​ເຮັດ​ໜ້າ​ທີ່ຊຸກຍູ້, ສົ່ງ​ເສີມ ທັງ​ຕິດຕາມ​ກວດກາການ​ເຄື່ອນ​ໄຫວວຽກ​ງານ​ຂອງການພົວພັນຮ່ວມມື ລະຫວ່າງ ລາວ ແລະ ຫວຽດນາມ ໃນ​ແຕ່ລະ​ໄລຍະຢ່າງມີປະສິດທິຜົນ ແລະ ຂໍອວຍພອນໃຫ້ເວບໄຊຈົ່ງປະສົບ​ຜົນ​ສໍາ​ເລັດ ​ໃນ​ການ​ປະຕິບັດ​ໜ້າ​ທີ່​ອັນ​ມີ​ກຽດສະຫງ່າ​ຂອງ​ຕົນ.